早前報道（https://goo.gl/sg0r5b）提及有山友因不滿行山活動商業化，開設了名為「The Hiking Boys山野‧男生」（下稱山野男生）的Facebook Page，矛頭直指「The Hiking Girls山野‧女生」（下稱山野女生）及一眾山系KOL。今次我們請來原裝正版「The Hiking Girls山野‧女生」的Tanya，一一回應指控。
記者：華嘉昌
編輯：任盈
部份相片由受訪者提供
記：為什麼會開一個專為女仔而設的行山平台？
Tanya：因為我想其他女仔可以同我一樣，感受到大自然的力量。女仔成日覺得自己力量好細，但其實唔係。女仔都可以好Tough、好Strong。希望其他女仔都唔好睇小自己，勇敢做啲人哋以為自己做唔到嘅事。當初我喺人生最低潮嘅時候，係靠爬山、靠大自然搵番力量。希望其他女仔都唔好以為運動係男生嘅專利。我希望更多女仔可以接觸到行山資訊，可以一齊參與戶外活動。
記：回應早前報道，山野男生表示擔心你哋着Bra top或Bikini去行山容易蚊叮蟲咬、刮傷和凍親。
Tanya：登山是享受自然的活動，衣着上實質沒有任何特定要求，只要了解自己身體狀態及外在環境狀況，實際上衣着不影響運動的安全性。料不到只是一兩天偶然因天氣過熱豁出去，就被人無限放大。我實在沒有留意自己穿了什麼服飾，往後會加倍留意。
記：你會唔會因為批評而着得密實啲？
Tanya：其實我冇着得暴露（苦笑）。
記：你介唔介意俾人咁講？
Tanya：秉承我行我素的性格，實在沒有介意，我覺得行得舒服就得。
- 需資源營運平台 「唔想玩玩吓」
記：山野男生表示反對行山活動商業化，又批評一些KOL在寫產品評測的時候，借故為一些品牌賣廣告，你又點睇？
Tanya：香港人在生活上很多方面都顯得很敏感。大家如果對生活少點執着，多點欣賞，香港其實可以有更多正能量，這亦正正是The Hiking Girls希望帶出的訊息，希望傳播環保訊息，令大眾更加明白登山活動的樂趣，大家享受大自然、享受極限運動的同時，亦為環境負責、為自身安全負責。要令訊息傳播得更廣，平台需要成為一個可自行營運，及有延續性的架構；而要達成理念，則需要物資。
平台上，山野女生的活動分享、產品分享，都是實實在在經過第一身實測作出的評價，對一些初初接觸户外活動的人，這些評語可予他們參考。裝備適當器材上山，安全性便可大大提高。
記：你指分享平台需要可自行營運、延續性，及要物資輔助，那是不是說這類平台商業化有其需要或無可避免？
Tanya：有資源就可以長期營運，視乎大家有咩唔同途徑去搵資源營運。資源係延續生命嘅基本，一個平台都係生命，一個平台同樣需要資源，不能夠用玩玩吓嘅心態做。
記：你如何回應有山友反對行山商業化？
Tanya：有山友不明白，但係無可避免。冇人有無窮無盡嘅資源去建立內容，我哋需要資源建立內容、需要生存。加上要世人都接收到這個訊息和信念，唔係要圍內做，係要對外做，傳得越多人越好。就好似政府在環保方面嘅愚蠢制度，都需要靠群眾力量去改變，唔係個人嘅力量。
記：可唔可以話你希望將行山作為事業？
Tanya：將自己興趣變成事業係好夢想嘅一件事，就係因為係自己興趣、有熱情，先會做得好。我就係個追夢嘅人。
- 曝光多易惹批評 「我唔覺得係承受」
記：你會唔會覺得係犧牲，如果你一直只係造西裝，就唔使承受批評。（編按：Tanya本身是西裝店老闆。）
Tanya：唔會，我俾人批評得多，往往是因為我曝光較多，理唔到咁多。我宣揚正確登山觀念、正能量、愛護大自然的訊息，我唔覺得係承受，而且不可能取悅所有人，鍾意睇我哋平台嘅人自然會繼續睇。
山野女生嘅目標由始至終都一樣，就係要成為一個有教育意義嘅野外活動資訊平台，令登山活動普及化；這一點我們已經慢慢達到，而大眾都慢慢自覺地提高咗保育意識。上完山執垃圾，真係見到其他人受感染後，會自動自覺，自發上山執垃圾，可見大家慢慢學識認真對待大自然、尊重環境。要達到以上目標，一個機構、團體需要資金運行。
多人玩山的同時，亦要多人去傳遞正確觀念，咁先做到保護環境，大家不需要理會無謂八卦，將眼光放在花邊新聞上，同一幅相講廿次，我見到都悶了。
*問題次序、部份句子、用字經編輯修改，以便閱讀，已力求保留原意。
香港行山雜誌 | 遠足 | 遊記路線 | 報道 - 風火山林 